അപരത്വത്തെ രാഷ്ട്രീയമായും സിദ്ധാന്തപരമായും അഭിമുഖികരിക്കുന്ന മലയാളത്തിലെ ആദ്യത്തെ പുസ്തകമാണിത്.
ആധുനികാനന്തര കാലത്ത് അപരം എന്ന അവസ്ഥയെ പറ്റിയുള്ള ഉൾക്കാഴ്ചകൾ ലോകമെമ്പാടും രൂപപ്പെട്ടിട്ടുണ്ട്. അദൃശ്യരും നിഴലിൽ നിൽക്കുന്നവരുമായി കണക്കാക്കപ്പെടുന്നവരുമായ ജനതകളുടെ ജീവിത സമരങ്ങളും സാമൂഹികമായ ചലനങ്ങളും ഇത്തരം പുതു വീഷണങ്ങൾക്ക് അടിത്തറയിട്ടു.
ഈ പശ്ചാത്തലത്തിൽ കേരളത്തിൽ കഴിഞ്ഞ കുറെ വർഷങ്ങളായി നടക്കുന്ന അരികുവൽക്കരിക്കപ്പെട്ടവരുടെ രാഷ്ട്രീയ മുന്നേറ്റങ്ങളിലും സൈദ്ധാന്തിക സംവാദങ്ങളിലും സജീവമായി പങ്കെടുത്തതിന്റെ ഫലമായി എഴുതിയ അനുഭവ കുറിപ്പുകളും വിശകലനങ്ങളും വിലയിരുത്തലുകളുമാണ് ഇതിലുള്ളത്.
കേവല സ്വത്വ വാദത്തിലേക്ക് വഴുതി വീഴുന്നില്ലെന്നതും കീഴള വിഷയങ്ങളെ സംവാദപരമായി ഉയർത്തുന്നു എന്നതുമാണ് ഈ പുസ്തകത്തെ വേറിട്ടതാകുന്നത്. ഇതേസമയം , അധികാര വിമർശനത്തെ വ്യക്തി വാദത്തിലേക്കു ചുരുക്കുന്ന സമകാലീന വരേണ്യതകളോട് വിട്ടുവീഴ്ച കാണിക്കുന്നുമില്ല.
അനുഭവം, സംവാദം, ഇടപെടൽ എന്ന മൂന്നു ഭാഗങ്ങളുള്ള ഇതിൽ മുപ്പത്തോളം പഠന /ലേഖനങ്ങളാണുള്ളത്.
കീഴള കുടിയേറ്റ ഭൂതകാലത്തിന്റെ മാഞ്ഞും മറന്നും പോയ ചെറു ജീവിതങ്ങൾ, കോഴിക്കോട്ടെയും എറണാകുളത്തെയും നഗരജീവിതം, ദളിത്‌ - ന്യൂന പക്ഷ സമുദായികതയും മതവും, ഫാസിസ്റ്റ് കാലത്തെ പാരസ്പര്യങ്ങൾ, ഫെമിനിസങ്ങൾ, യൂത്ത്‌ കൾച്ചർ, പോർണോഗ്രഫി , സ്വവർഗ്ഗ ലൈംഗീകത, പൗരത്വ നിയമ വിരുദ്ധ പ്രക്ഷോഭം, ആത്മ കഥാ പഠനങ്ങൾ, സിനിമ -സംഗീത -നോവൽ വിമർശനങ്ങൾ, ഊന സമരവും രോഹിത് വെമുലയും, ആഫ്രോ -അറബ് ജന സഞ്ചയ മുന്നേറ്റങ്ങൾ, അമേരിക്കയിലെ അപര കലാപങ്ങൾ മുതലായ നിരവധി വിഷയങ്ങളിലുള്ള പുതു രാഷ്ട്രീയ, വൈജ്ഞാനിക ചിന്തകൾ ഈ പുസ്തകത്തിൽ ഉള്ളടങ്ങുന്നുണ്ട്