കേരള ഭാഷാ ഇൻസ്റ്റിറ്റ്യൂട്ട് പ്രസിദ്ധീകരിക്കുന്ന ചങ്ങമ്പുഴ സമ്പൂർണ ഗദ്യകൃതികളുടെ സമ്പാദനവും പഠനവും നിർവഹിച്ചത് ശ്രീ.പിരപ്പൻകോട് മുരളിയാണ്. മലയാളത്തിൽ ആദ്യമായി ചങ്ങമ്പുഴ സമ്പൂർണ ഗദ്യകൃതികൾ പ്രസിദ്ധീകരിക്കുന്നത് ഭാഷാ ഇൻസ്റ്റിറ്റ്യൂട്ടാണ്. പുസ്തകം വില്പനയിൽ ലഭ്യമാണ്. സമ്പൂർണ ഗദ്യകൃതികളുടെ ഔപചാരികമായ പ്രകാശനം താമസിയാതെ നടത്തുന്നതാണ്.

ചങ്ങമ്പുഴയുടെ ഗദ്യകൃതികള്‍ പതിനൊന്ന് അധ്യായങ്ങളിലായാണ് ഉള്‍ക്കൊള്ളിച്ചിട്ടുള്ളത്. യഥാക്രമം ചങ്ങമ്പുഴയുടെ ഏക നോവലായ 'കളിത്തോഴി', സ്വന്തം ചെറുകഥാ സമാഹാരമായ 'ശിഥിലഹൃദയം', നോര്‍വീജിയന്‍ നോവല്‍ തര്‍ജമയായ 'പ്രതികാരദുര്‍ഗ', വിശ്വസാഹിത്യനായകരുടെ ചെറുകഥകളുടെ തര്‍ജമ 'പൂനിലാവില്‍', ചാള്‍സ് ലാംബിന്റെ കഥാസംഗ്രഹമായ 'കഥാരത്ന മാലിക' (തര്‍ജമ), 'വിശ്വസാഹിത്യത്തില്‍ നിന്നുള്ള നാടകങ്ങള്‍', ആത്മകഥ യായ 'തുടിക്കുന്ന താളുകള്‍', കോട്ടയം പുരോഗമന സാഹിത്യ സമ്മേളനത്തിലെ അധ്യക്ഷ പ്രസംഗമായ 'സാഹിത്യ ചിന്തകള്‍', തന്റെ സ്വന്തം സാഹിത്യ പദ്ധതി കള്‍ വെളിപ്പെടുത്തുന്ന 'എന്റെ സാഹിത്യ സിദ്ധാന്തങ്ങള്‍', 'സമാഹരിക്കാത്ത ലേഖനങ്ങള്‍', 'ചങ്ങമ്പുഴയുടെ കത്തുകള്‍' എന്നിങ്ങനെയാണ് വിന്യസിച്ചിട്ടുള്ളത്