ബലരാമചിത്തത്തിലൂടെയുള്ള മഹാഭാരത പര്യടനം എന്ന് സുരേന്ദ്രൻ മങ്ങാട്ടിന്റെ നോവലിനെ വിശേഷിപ്പിക്കാം. കഥകളും ഉപകഥകളും അംശകഥകളുമായി കഥാഖ്യാനത്തിന്റെ സാഗരസമൃദ്ധിക്കു നിദർശനമായിട്ടുള്ള മഹാഭാരത ഇതിഹാസത്തെ ഒരു കൈക്കുമ്പിളിൽ കോരിയെടുത്ത് വായനക്കാർക്കായി തർപ്പണം ചെയ്യുകയാണ് ബലരാമൻ എന്ന നോവൽ. വിശദാംശങ്ങൾ സ്വയം ഉണർന്നുവരും വിധം ധന്യാത്മകമായ ആഖ്യാനസൂചനകൾ നിർബന്ധിക്കുന്നതിൽ' സുരേന്ദ്രൻ മങ്ങാട്ടിനുള്ള സാമർത്ഥ്യം ഈ നോവലിനെ ഒരു ഖണ്ഡകാവ്യഘടനയോട് അടുപ്പിച്ച് നിർത്തുകയും ചെയ്യുന്നു. മലയാളത്തിലെ ഇതിഹാസോപജീവ്യമായ ആഖ്യാനരൂപങ്ങൾക്കിടയിൽ വ്യതിരിക്തവ്യക്തിത്വമുള്ള നോവൽ മാതൃക എന്ന നിലയിൽ സുരേന്ദ്രൻ മങ്ങാട്ടിന്റെ ബലരാമനെ പരിചയപ്പെടാൻ പ്രബുദ്ധരായ വായനക്കാരെ സ്നേഹപൂർവ്വം ക്ഷണിക്കുന്നു.